SHIRIKA LA BIASHARA LA TAIFA ZANZIBAR (ZSTC) LAFANYA MKUTANO NA WAKULIMA WA KARAFUU MKOA WA KUSINI

Mkuu wa Mkoa Kusini Unguja Dkt. Idrissa Muslih Hijja akifungua Mkutano wa Wakulima wa zao la Karafuu wa Mkoa Huo uliofanyika Skuli ya Dunga.

Mkurugenzi Mwendeshaji wa Shirika la Biashara la Taifa Zanzibar (ZSTC) Mwanahija Almas Ali akizungumza na wakulima wa zao la Karafuu katika mkutano uliofanyika Skuli ya Dunga.

Afisa kutoka Wizara ya Kilimo na Maliasili Badru Mwemvura akitoa tathmini ya ugawaji wa miche ya mikarafuu inayotolewa na Wizara ya Kilimo na Maliasili katika mkutano wa wazalishaji wa zao la karafu wa Mkoa Kusini Unguja.

 

Baadhi ya wakulima wa zao la karafuu wakifuatilia mkutano huo uliofanyika Skuli ya Dunga.

Habari Picha- na Makame Mshenga- Maelezo Zanzibar. 

 

Mkurugenzi Mwendeshaji wa Shirika la Biashara la Taifa Zanzibar (ZSTC) Mwanahija Almas Ali amewataka wakulima wa zao la Karafuu kuunga mkono  juhudi zinazochukuliwa na Serikali katika kuhakikisha ubora wa zao la Karafuu za Zanzibar  unabakia ili kukidhi vigezo vya sifa vya Kimataifa.

Akizungumza  katika mkukutano wa Wakulima wa Karafuu wa Mkoa Kusini Unguja uliofanyika Skuli ya Dunga amesema lengo la Serikali katika kilimo cha zao la Karafuu ni kuona linaendelea kuwa tegemeo katika kuingiza fedha za kigeni na kusaidia kukuza Uchumi hivyo linahitaji kulindwa na kila Mwananchi kwa kuongeza uzalishaji na kulinda ubora.

Mwanahija ameeleza kuwa Karafuu ni zao la Kilimo lenye faida kubwa katika kuimarisha uchumi na ametaka kila mmoja ashiriki katika kulikuza na kuliendeleza ili kuhuisha ustawi wa wakulima na wananchi kwa jumla.

“Kukuza Kilimo cha Karafuu ni sawa na kukuza maendeleo ya Zanzibar, jitihada za makusudi zinahitajika ili lengo la Serikali liweze kufikiwa,” alisisitiza Mkurugenzi Mwendeshaji ZSTC.

Amewataka wakulima wa zao hilo kuchukua jitihada za makusudi kuhakikisha usafi wa Karafuu  unaimarika kwa vile  hadaa na uchafuzi wa zao hilo ni hasara kwa wakulima, wananchi na Taifa. 

Mwenyekiti wa Bodi ya Wakurugenzi ya ZSTC Kassim Maalim Suleiman amewataka  Wakulima wa zao la Karafuu kutumia utaalamu wa kisasa na kuachana kuendeleza Kilimo hicho kwa mazoea.

Aidha amewashauri Wakulima hao kufungua akaunti benki ili waweze kuingiziwa fedha  moja kwa moja baada ya kuuza Karafuu zao na kuachana na tabia iliyozoeleka ya kutembea na fedha nyingi mifukoni.

Akifungua mkutano huo Mkuu wa Mkoa Kusini Unguja Dkt. Idrissa Muslih Hijja amelipongeza Shirika  la Biashara la Taifa Zanzibar  kwa kuwa karibu na Wakulima wa zao hilo.

Amevitaka vyombo vya ulinzi na usalama kuendeleza juhudi za kupambana na baadhi ya watu wanaoendelea kusafirisha zao hilo kwa njia ya magendo licha ya kuwa vitendo hivyo vimepungua kwa sasa. 

Afisa kutoka Wizara ya Kilimo na Maliasili Badru Mwemvura amesema Wizara inaendelea kuchukua jitihada za kuimarisha zao la Karafuu kwa kuatika miche na kutoa bure kwa Wakulima.

Alisema lengo lilikuwa ni kuotesha miche 500, 000 kwa mwaka Unguja na Pemba ili kufufua  zao la Karafuu kuanzia  mwanzoni mwa miaka ya 2000 kutokana na kushuka uzalishaji wa zao hilo.

Hata  hivyo amesema kuanzia mwaka 2012 hadi mwaka uliopita lengo hilo liliongezeka na kufikia  1,000,000 baada ya Wizara kushajiisha jamii kuotesha miche ya mikarafuu kupitia skuli za wakulima.

Ameongeza kuwa miche ya mikarafuu inagawiwa bure kwa Wakulima kupitia kwa masheha, maafisa Kilimo na misitu wa Wilaya na kila mkulima hupatiwa miche 35 hadi 40 na Wizara  imekuwa ikifuatilia kwa karibu maendeleo ya uotaji wake.

Mwemvura  amesema pamoja na juhudi hizo bado zipo changamoto nyingi ikiwemo mahitaji ya miche kuwa kubwa kuliko uwezo wa kuotesha, huduma dhaifu kwa mikarafuu michanga na baadhi ya wakulima kutaka miche mingi kuliko uwezo wa kuipanda na kuihudumia.                                          

Wakitoa michango yao baadhi ya Wakulima wamelalamikia ugawaji mbaya wa miche ya mikarafuu unaofanywa na Maafisa wa Kilimo kwa kutoa miche yenye ubora kwa wakubwa na wengine kupewa miche dhaifu ambayo mingi ya miche hiyo inakufa.

Aidha Wakulima hao wamesisiza juu ya usimamizi wa Sheria ili ziweze kusaidi kulinda ubora wa zao hilo la Karafuu na kutomuonea muhali mtu yoyote.